हरिबोधनी एकादशीको अवसरमा जनशान्ती युवा क्लब भिमादले आयोजना गरेको खुल्ला गाउँ तथा साबिक वडा स्तरिय पुरुष सिनियर भलिबल , वडा स्तरिय महिला भलिबल , तथा सेभेन ए साइड फुटबल प्रतियोगिता सम्पन्न भएको छ । युवा एकता हाम्रो अभियान , समुन्नत समाज हाम्रो उद्देश्य भन्ने नारा सहित आयोजना गरेको पुरुष भलिबल प्रतियोगिताको उपाधि भने डेढगाउँ भलिबल क्लब उचालेको छ । सोमबार भएको फाइनल खेलमा ३-० अङ्कले पिरुङ्ग स्पोर्ट्स क्लबलाई पछि पार्दै उपाधि उचाल्न सफल भएको हो । पुरुष भलिबल प्रतियगिताको उपाधी उचाल्दै ७० हजारको साथमा शिल्ड मेडल र प्रमाणपत्र प्राप्त गरेका छन् भने पिरुङ्ग स्पोर्टस क्लबले ४० हजारको साथमा शिल्ड मेडल र प्रमाणपत्र प्राप्त गरेको छ । यस्तै महिला भलिबल प्रतियोगिताको उपाधि भने कालिका पुन मगर युथ क्लबले जनशान्ती युवा क्लबलाई पराजीत गर्दै विजयी बनेको छ । महिला भलिबल प्रतियोगितामा प्रथम र द्धितीय हुने टिमले क्रमश २५ र १५ हजारको साथमा शिल्ड मेडल र प्रमाणपत्र प्राप्त गरेको जनशान्ती युवा क्लबले जनाएको छ । यस्तै पुरुष फुटबल प्रतियोगिताको उपाधि भने प्रगति युवा क्लबले उचालेको छ । वरपिपल युवा क्लब थाङ्दी लाई पराजित गर्दै प्रगति युवा क्लबले प्रतियोगिताको उपाधि जितेको हो । फुटबल प्रतियोगितामा प्रथम र द्धितीय हुने टिमले क्रमश २०,१० हजारको साथमा शिल्ड मेडल र प्रमाणपत्र प्राप्त गरेको जनशान्ती युवा क्लब भिमादका अध्यक्ष पदम कुमार श्रेष्ठले जानकारी दिए ।
